• Улаанбаатар
    | Шөнө ℃
  • Маргааш
    | Шөнө ℃
Social Icons

Social Connect

2020-03-18 10:02:09

Д.САРАНГЭРЭЛ: БИД ХАМТДАА ХЭН НЭГНЭЭ ХАЯЖ ГЭЭЛГҮЙ COVID-19-ИЙГ ЦУРМАНД ОРУУЛЖ ТАРХАХААС СЭРГИЙЛЖ ЧАДНА

Дэлхий нийтэд тархаад байгаа шинэ коронавирусын халдварын тархалт өдрөөс өдөрт нэмэгдэж байна. Манай улсад өчигдрийн байдлаар тав дахь тохиолдол бүртгэгдээд байгаа билээ. Энэ талаар Эрүүл мэндийн сайд Д.Сарангэрэл өөрийн фэйсбүүк хуудсандаа ийн бичжээ. ЭМ-ийн сайдын бичсэнийг бүрэн эхээр нь хүргэе. 

"Өнөөдөр /2020.03.17/ орой 18:03 цагт коронавирусын тав дахь тохиолдол гарлаа. Гурван сар салбарынхан маань төр засаг, түмэн олонтойгоо хамт халдварыг хориглож барьсан болохоор хэцүү бас гунигтай санагдана. Гаднаас зөөвөрлөгдөж орж ирсэн нь л дургүй хүргээд байгаа бололтой. Хэрэв тусгай үүргийн онгоц нисгээгүй бол гэсэн бодол зурвасхийн орж ирж амжиж байна.

Гэхдээ энэ бодол хэрэв миний үр хүүхэд, ээж аав, эмээ өвөө, эгч дүүс хоолны мөнгөгүй, буудлын зардалгүй хүний газар өвдөж шаналан байхад би онгоц битгий нисгэ гэж хэлж чадах болов уу хэмээн хэмээн бодох сацуйд сарнин одлоо.   Түүгээр ч зогсохгүй Монгол Улсын иргэн гадаадад явах, суух, эх орондоо ирэх Үндсэн хуулийн эрхийг ч нэхэн саналаа. Маргааш Турк руу онгоц нисгэж дахин хэдэн Монголчуудаа авчирах нь. Энэ онгоцоор 2 нас ч хүрээгүй зүрх, тархины хавсарсан төрөлхийн хавдартай  бяцхан хүү, хөгшин хөвөө, бие давхар гээд 250 иргэн маань эх орноо тэмцэн ирнэ. Зарим оронд манай оюутнуудыг байрнаас нь эелдгээр "хөөж" байгаа сураг байна. Тэднийгээ халдвар тархсан улс оронд хувь заяанд нь даатгаж хөсөр хая гэх хүн монголчуудын маань дунд тэгэх  тусмаа эх хүн, эмэгтэй хүн үгүй буй заа.  

Өнөөдөр "К" халдвар дэлхийн 164 оронд хэдийнэ тархжээ. 200-гаад мянган хүн өвчилж, 7 мянга гаруй нь хорвоог орхилоо.  Бид халдвар оруулалгүй тэсэхийн дээдээр тэссэн. Тэгэх тусмаа ард иргэд маань ямар дэг журамтай, эмх цэгцтэй, нягт нямбай байв аа. Бүр цагаан сараа ч өнжсөн. Өнөөдөр маск зүүгээгүй хүн алга. Ундааны сав цуглуулж буй эр ч масктай явахыг харлаа. Гараа угааж, гадуур явах нь цөөрч. Ханиад томуу, халдварт өвчин ч хоёр, гурав дахин буурч байна. Коронагийн халдварын сургаар соёлт ертөнц үймэрч германчууд ариун цэврийн цаасан дээр зодолдож, англичууд Харибо, шоколад хуу хамж байхад монголчууд мах, гурилаа базааж байх жишээтэй. Амьдралын ухаан биш гэж үү. 

Бид хүндрэлийг давж чадна аа. Төр засаг маань ч зоримог шийдэмгий тал талыг тооцон ажиллаж, тухайлбал эрүүл мэндийн салбарын бэлэн байдлыг хангахад онцгой анхаарч байна. Эрдэм боловсролтой элэг зөөлөн эмч, мэргэжилтнүүд маань та бүхэнтэйгээ хамт энэхүү аюулт өвчнийг эрсдэл багатай даван туулж чадна гэдэгтээ итгэлтэй байгаа. Д.Нацагдорж хамба тэргүүтэй уламжлалтынхан маань ч хамгийн хүндэрсэн хүнийг ч эмчлэхийн төлөө хамт карантилагдаад зүтгэнэ гэлээ. Манайхан Сарс, Мерс, Холер, Улаан бурхан гээд олон халдварт өвчний ард амжилттай гарч байсан түүхтэй. 

Дэлхийн эрүүл мэндийн байгууллага Монгол улсыг хамгийн эрсдэлтэй орон гэж тооцож байсан ч түргэн шуурхай, зөв зохион байгуулалттай ажиллаж халдвараас сэргийлж байгаа загвар орон гэж үнэллээ. Бид коронавирус зөөвөрлөгдөн орж ирэхээс айж байсан. Гэвч тэр ирлээ. Гэхдээ  бид хамтдаа хэн нэгнээ хаяж гээлгүй КОВИД19-ийг цурманд оруулж тархахаас сэргийлэх чадна. Харин энэ үйлсэд уужуу ухаант элэг нэгт ахан дүүс та бүхний маань эв санааны нэгдэл, хүчин чармайлт, тус дэм хоёр дахин хэрэгтэй болно. Бид дахин хичээх болно. Бид хүнээ хаядаггүй  Төрт улсын иргэд" хэмээн бичжээ. 

нийтлэгч:

Сэтгэгдэл